Ondas de pedra no deserto

12 DE XULLO DE 2012  

Só 20 persoas ao día poden visitar a zona semi-desértica de Coyote Buttes North en Utah.  Sortéanse dez permisos por internet con catro meses de anticipación e os outros dez o día anterior no centro de visitantes. Non tivemos sorte no primeiro dos sorteos, así que asistimos ao segundo xunto con outras 22 persoas interesadas en visitar o lugar. Dous gardas encargáronse de explicar o procedemento para o sorteo que se efectuou á vista de todos os presentes. Desta vez sorriunos a fortuna e obtivemos o permiso para facer unha ruta polo lugar. Despois do sorteo os elixidos recibimos un mapa (non dispoñible para o público xeral) coas instruccións secretas para chegar a The Wave.

E que é The Wave para despertar tanto interese e merecer tanta protección? Pois é un pequeno espazo de areniscas excavado e pulido pola auga e o vento, de formas onduladas e colores cálidos, tan irreal que é imposible imaxinar algo así antes de telo visto.

Para chegar ata alí hai que camiñar durante dúas horas polo máis parecido a un deserto que vimos nesta viaxe: area, dunas, pedras, cauces secos, arbustos mortos.

Non hai camiño marcado, de ahí que sexa tan importante ter as instruccións para chegar. A ida xa merece a pena en sí mesma, polo desafío de orientarse e polas bonitas formas das rochas e montañas que parecen un avance do que nos espera máis adiante.

Resulta sorprendente como nun espazo de tan poucos metros se poden encontrar tantos rincóns distintos con só un pequeno cambio de perspectiva. É case adictivo mirar e sacar fotos a cada metro cadrado e parece que nunca o acabas de mirar de todo.

Un dos gardas explicou que se impoñía un límite de visitas por dous motivos principais: protexer as fráxiles rochas e garantizar que os poucos e afortunados visitantes teñan unha experiencia única nun espazo natural e salvaxe, marcando a diferencia coa visita que se pode facer no cercano Antelope Canyon.