A reserva de rinocerontes de Nakuru

  19 DE XULLO DE 2013

Pasamos todo o día de safari no parque nacional de Nakuru, outro dos lagos do Rift Valley, caracterizado por unha paisaxe verde e boscosa. Un dos seus maiores atractivos é a vista do lago abarrotado de flamencos, pero como o nivel de auga estaba moi alto a salinidade non era suficiente para que estas aves se xuntasen en grandes cantidades.

Outro elemento de interese deste parque é a facilidade coa que se poden ver as dúas especies africanas de rinoceronte: o branco e o negro. A principal diferencia entre eles non está na cor, senón na forma da boca, picuda e estreita no rinoceronte negro, e ancha e cadrada no rinoceronte branco. Ambas especies están en perigo de extinción debido principalmente á caza furtiva, pero a situación do rinoceronte negro é moito máis grave.

O parque nacional do lago Nakuru é o único dos que visitamos que está valado, xa que por estar pegado a unha cidade é necesario protexer á poboación dos animais salvaxes e viceversa.

En África hai diferentes subespecies de xirafa que se distinguen entre si polo estampado da pel. En Amboseli vive a xirafa masai, e aquí en Nakuru está unha das poboacións mais importantes de xirafa de Rothschild, que ten o borde das manchas definido con maior claridade.

Multitude de especies de aves, réptiles e mamíferos completan o catálogo que se pode observar en Nakuru:

Aproveitamos a visita a unha fervenza do parque para parar a comer, co coidado de non ser vítimas dos habituais roubos de comida por parte dos babuínos.