27 E 28 DE DECEMBRO DE 2017
Marrakesh foi fundada polos almorávides en 1062 na cara atlántica da cordilleira do Atlas, un lugar estratéxico para controlar as caravanas de camellos que comerciaban entre o Magreb e a África subsahariana. Construíron murallas, xardíns, mezquitas e pazos, pero 80 anos despois outra tribu bereber, os almohades, conquistaron a cidade e só deixaron en pé as murallas.
Sen embargo, enseguida superaron aos seus predecesores reconstruíndo a cidade con maior esplendor arquitectónico, facendo dela ademais un foco cultural do mundo islámico. Consérvase desta época a mezquita Kutubía e o seu minarete, un dos símbolos da cidade. O seu parecido coa Giralda de Sevilla non é casual, pois os almohades tamén dominaron Al-Andalus e os mellores mestres e artesáns traballaban en todas as rexións do imperio.
Pero logo dun século de dominio, os almohades sufriron importantes derrotas e rebelións, tanto na Península Ibérica como en Marrocos, dando paso á dinastía dos Benimerines, que trasladaron a capital a Fez e sumiron a Marrakesh nun periodo de decadencia que durou tres séculos.
En 1549 a cidade recuperou a capitalidade coa dinastía Saadí, que fixo dela unha vez máis unha cidade de referencia no mundo islámico. Embeleceron e restauraron edificios antigos e edificaron novos e luxosos pazos sen escatimar gastos. O mausoleo dos príncipes saadíes é unha boa mostra da riqueza, o gusto e o poder desta dinastía.
 |
| Mausoleo dos príncipes saadíes |
 |
| Mezquita das mazás de ouro, reconstruida polos saadíes |
Unha importante comunidade xudea foi acollida no barrio coñecido como mellah e contaba con sinagogas e un cemiterio propio.
A dinastía alauita, á que pertence o actual soberano de Marrocos, tomou o control en 1669 e estableceu a capital en Mequinez, pero desta vez Marrakesh continuou desenvolvéndose cultural e económicamente. A finais do século XIX aínda se construían pazos con abigarrada ornamentación clásica, con paredes e columnas recubertas de mosaicos, artesonados e filigranas e grafías de xeso.
 |
| Museo de Marrakesh, nun pazo do século XIX |
 |
| Museo de Marrakesh |
 |
| Patio central do museo de Marrakesh |
 |
| Pazo da Bahía, do século XIX |
 |
| Pazo da Bahía |
 |
| Pazo da Bahía |
 |
| Pazo da Bahía |
A principios do século XX Marrocos quedou baixo o protectorado francés, e numerosos artistas e intelectuais europeos comezaron a instalarse na cidade. Unha mostra desta época son os xardíns creados polo pintor Jacques Majorelle e restaurados nos anos 80 por Yves Saint Laurent.
